ފަންސަވީސް ރުފިޔާއަށް އަގު ބޮޑުކޮށް މަސްވެރިން ގުއި ރޯނުގައި ޖައްސައިގެން ވޯޓު ހޯދަން މަސައްކަތްކުރީ އިބޫ ޞާލިޙު

މަސްވެރިން ކިރާ މަސް ކިލޯއަކަށް 25 ރުފިޔާ ދޭނޭކަމަށްބުނެ އިބޫ ޞާލިހު 2023 ސެޕްޓެމްބަރ 17 ވަނަ ދުވަހު ކެމްޕޭން ޖަލްސާއެއްގައި މަހުގެ އަގު އުފުލިއެވެ. އަދި އިބޫ ވަރުގެ ނުވަތަ އެމްޑީޕީ ވަރުގެ ރައްޔިތުންގެ ދެކެ ލޯބިވާ ބަޔަކު ނެތްކަމަށް ދައްކާ ރައްޔިތުން ހައްލުވައިގެން ވޯޓު ހޯދަން މަސައްކަތްކުރިއެވެ. ނަތީޖާއެއްގެ ގޮތުން އެ ގުއިރޯނުގައި ބަޔަކު ޖެހި ވަރަށް ގިނަ ވޯޓު މަސްވެރިންގެ ތެރެއިން ބަޔަކު އިބޫ ޞާލިޙުއަށް ހަދިޔާކުރިއެވެ.

އެހެންނަމަވެސް އާޚިރު ނަތީޖާއަކީ ކޮބައިތޯއެވެ. 2023 ނޮވެމްބަރ 17 ވަނަދުވަހު ވެރިކަން ދޫކޮށް އިބޫ ދިޔަ އިރުވެސް މަސްވެރިންނަށް ދޭންބުނި 25 ރުފިޔާގެ އަގު ވެގެން ދިޔައީ ބިލާހަކަށެވެ. އެފައިސާ ފޮތި ދުށް ލޮލެއް ދުނިޔެމަތީގައި ނެތެވެ. މިވަރުގެ މަކަރާއި ޙީލަތް ނުހަދާވެސް ވޯޓު ހޯދަން ކެމްޕޭންކުރެވިދާނެތާއެވެ.

ވެރިކަން ދޫކޮށް އިބޫ ދިޔަ އިރު ދިވެހި ސަރުކާރުގައި ފީ އިލޮށްޓެއް ގަނެލެވޭ ވަރުވެސް ނެތް ވާހަކަ ކުރިންވެސް އަޅުގަނޑު ދެންނެވީމެވެ. އެހެން ކަމުން މިހާރު މިހިނގާ ސަރުކާރު ވެރިކަމާ ޙަވާލުވުމަށްފަހު ދެވެން ހުރި ވަރަކުން އެފައިސާ މަސްވެރިންނަށް ދެވޭތޯ ނުހަނު އިޚްލާޞްތެރިކަމާއެކު މަސައްކަތް ފަށާ ދެވުނު ވަރަކުން ފައިސާ ރައްދުކުރެވޭތޯ ބަލަމުން ދިޔައެވެ. ނަމަވެސް ނެތް އެއްޗެސް އެންމެ އެދެވޭ ގޮތުގައި ދެވޭނީ ކިހިނެތްތޯއެވެ. 25 ރުފިޔާއަށް އަގު ހެދީ ކެމްޕޭނުގައި ވޯޓު ހޯދާށެވެ. އެއީ އިބޫ ކުރިކަމެކެވެ. ކޮންމެހެން އެފައިސާ ދޭން ކުރިކަމެއްނޫނެވެ. އިބޫ ހޮވިއްޖެނަމަ ކުރިން މަހުގެ އަގުހުރި ވަރަށް އަގު ދަށްކުރަން އޭރު އޮތީ ނިންމާފައިކަމަށް ވަތުބަތާނައަށްވަނީ ޔަޤީންކުރެވިފައެވެ.

މިހާރުގެ ސަރުކާރުން ނިންމާފައި އޮތީ، 18 މަސްދުވަހުގެ ތެރޭގައި އައިސް ސްޓޮރޭޖް ބޮޑުކޮށް ރައްޔިޔުން ބާނާ މަސް ބާކީކޮށްނުލާ އެއްކޮށް ގަނެވޭވަރު ކުރުމަށެވެ. އަދި އައިސް ނުލިބި 5 މިނެޓްވެސް ހޭދަކުރަން ނުޖެހޭނޭ ވަރުގެ ޤާބިލްކަން އައިސް ޕްލާންޓްތަކަށް އިތުރުކޮށްދިނުމެވެ.

އެއިރުން ކިރާ މަހަށް 24 ގަޑި އިރުން ފައިސާ ލިބޭނެއެވެ. މަސް ނުކިރިފައި ތިބޭކަށްވެސް އެއްވެސް މަސްދޯންޏަކަށް ނުޖެހޭނެއެވެ. މަސްވެރިންނަށް މިވަގުތު އޮތީ ސަރުކާރު ހަމަޖެހިލުމަށްޓަކައި ކެތްތެރިވެ ކުޑަކުޑަ ވަގުތުކޮޅެއް އަދި ސަރުކާރަށް ދެއްވުމެވެ. މިއީ ހެޔޮ ނަސޭހަތެކެވެ. މަސްވެރިންނަށް ވަރަށް ބޮޑަށް ޝުކުރިއްޔާއެވެ.